Labe, 9 6ɓuru (Infosbruts.com) – Kulol no mawni e nder ngal duɗal Al Qur’an wonngal Hoore Saala, e nder ndee falnde Labe, e ɓaawo ngol ɗaɓɓitugol kun paykun gorun kun duuɓi 10. Jon duɗal ngal, Oustaze Mammadu Madaani Balde, no noddi yimɓe fow yo wallu mo o hetta kun sukalun gorun ɗoo.
Wano humpitoraa non, Abdulay Balde, iwdi Kankan, yalti ka duɗal Qur’ana e oo bimbi Alkamisa yawtuɗo. No seedeji holliraa e ardiiɓe duɗal ngal, kun cukalun hari no fijida e wondiiɓe mum yeeso ngal duɗal Qur’anaa. Kono o jokkuno goreeɓe makko janngooɓe e duɗal laamu wonngal takkoɗon.
Gila ɗun, Abdullay Balde hollitaaki hoore mum, o artaali kadi ka duɗal Al-Qur’an.
E yeeso ngonka hulɓiniika kaa, ɗaɓɓitugol heewungol waɗi e nder gure seraaji ɗin, kono haa jooni, ɗe heɓaali hay laawol cukalun gorun kun.
« Ko ɗun woni laawol aranol suka no yalta ɗoo hara o artaali. No ɗuuɗi, sukaaɓe ɓe yaltayɓe ka duɗal bimbi arta kiikiiɗe maa njango mum. Kono gila oo talibaajo noddirteeɗo Abdullay Balde, yalti ɗoo, men humpitaakimo, » holliti Oustaze Mammadu Madaani Balde.
Hay si tawii kulol mangol no mawni ka ardiiɓe duɗal ngal e ɓeynguure suka oo, hoolaare hino heddii. Jon duɗal Al-Qur’an ngal hino sikki suka oo no waawi wonde ka goreeɓe makko e nder ndee falnde Labé.
E nder ngonka kaa, o noddi kala neɗɗo yiuɗo Abdullay Balde yo wallumo o hunpitoo, yo jokkondir e ardiiɓe duɗal ngal. Kala hunpitiiɗo no waawi noddude e ndee limoore ɗoo: 623 34 65 68.
Ardiiɓe ngal duɗal Qur’ana no torii kadi ardiiɓe nokkuuji ɗii, ardiiɓe renndooji ɗii, e yimɓe fuw yo tawtu wallugol ɗaɓɓitugol kun cukalun wieteekun Abdullaye Balde. Kun arta ka duɗal makko e ka ɓeynguure makko e hoore jan e kisal.
InfosBruts.com wattanay yiila e ngol ɗaɓɓitugol, fii no hollitira janngooɓe mum kala kesun ko yaltiti.
Ɗiɗo ko Idiriisa Sanpirin Jallo winndi, wonande Infosbruts.com






