Labe, 30 6ɓuru (IBC) – Labe, komisiyoŋaaji ceertuɗi cosi ɗii ina ngolloo no feewi ngam ƴellitde kewu udditgol kaliifa keso Fuuta Jaloo potnooɗo yuɓɓineede ñalnde alet 7 lewru juko to Stade diiwaan Elhadj Saïfoulaye Diallo. Ujunaaje yimɓe ummoriiɓe kala nokku ina ɗaminaa hannde to Labé ngam rokkude ndee hiirde mbaydi keeriindi, ko ɗum woni ko infosbruts.com mon ñalnde kala e internet jooɗiiɗo to Gine hakkundeejo.
Wuro Labé hino hebilaade jaɓɓagol e balɗe arooje ɗee hiirde mawnde, jogiinde nafoore toownde to bannge politik, daartol, pinal e diine. Ko ɗum woni kewu udditgol laawɗungol Kaliifa Seneraal keso Fuuta Jaloo. E ooɗoo saa’a, ujunnaaje ujunnaaje neɗɗo hino habbaa e ndee nokkuure. Kadi almaami Labe on no faami darnde nguu batu e dow tolno ngenndiijo wonande ɓiɓɓe leydi ndii.
« Ko wieten hiɗen weltanii Allâhu ko tawata hiɗen mari sugu ɓeeɗoo mawɓe jikketeeɓe tawa ontuma ko hedditiikon enen fow en ndaaray ko honno ɓe ɗuwirta Fuuta tawa kono Fuuta e hedditiiɓe ɓen naɓidirira ɓuri no fewndorinii wurin. Ɓay tagaaɗo ko yelotoo ko ñanndewoo koyo ɓeydo. Haray si innaama non hooreejo Fuuta no joɗɗinee enen hiɗen anndi ko hikkitataɗon ko yen wakkilo. Fuuta kañun kadi ko ɗonɗaa. Ko honɗun Fuuta ɗonɗaa ? Fuuta no yonondiri. Pellet Fuuta no nannondiri, no nanana ardiiɓe ɗun ɓen. Haray kononon, fahin ɓay haray mobee ko yiɗata koyo ɓeydu yaarude yeeso, enen kadi ɓeynden wattande yiili kanɓe Alajji Alfâ Abdul Ghâdiri Dionfo noɓe maakiri nii kanɓe koɓe nuleteeɓe, haray kadi kosi enen en nulay, woodii ko Fuuta faalaa yaltintinde haray no waawi rewrude e maɓɓe. Kono non ko Fuuta ndaarata ko honɗun gasata fii Fuuta, Fuuta longinaɓe, ɗun yalta. Haray enen kadi ko honɗun torondirten ? Koyen wau wano nokkeeligoo ɗi sunantoɗen wairtanon. Hara si tawii ko en fow jikkiɓe, siɓe maakii konngol gootol, ɓay ɓe maakantaaen ko lorrataen enen Fuuta, hara fuutanke fow wonay e ley ngol konngol, ɓay haray ko konnguɗi siiwteeɗi. Koko nafata Fuuta, nafa Gine ko ɗun woni koɓe maakata », holliti ardiiɗo diinaajiɗin Labe, Cerno Mammadu Badru Ba.
Goomu yuɓɓinoowo hiirde ndee ina waɗa kala doole mbele hiirde ndee ina yahra no haanirta nii.
« Eɓɓoorenden, kono yoga e meeɗen wowtira. Kono ko hikkinaa yeeso, ko kala seeniiɗo ko yo waawu nanude ko wonaa e yewteede kon. Ontigi yiay kala ka ontigi hikkori e aduna on si tawii himo mari konession ka talifon makko. Ekranuuji maa waɗee e banngeeji kala e nder dingiralngal fii no gooto kala yiyra ko wonaa waɗeede kon » ɓeydi heen Cerno Mamadu Jan Abajada Jallo, ardiiɗo komisiyoŋ yuɓɓinoowo oo.
Yimbe leydi Labe no nodda yo ndarto doole mum fow jaɓɓagol, werna delegaasiyoŋaaji ceertuɗi tammbaaɗi ummoraade e geese nay leydi ndii e caggal leydi.
« Koɗkiiji ɗii maa tawnoree. Meɗen torii yimɓe ɓen yo hunpondir e ardiiɓe kartieeji ɗii ɓe hunoo cuuɗi hettiiɗiɗin fii yoɗi pareko ko adii hoɓɓe habbaaɓe ɓen hewtude » tintinnii ardiiɗo juulirde mawnde nden Labe, Alajji Ismaila Jallo.
E nder ɗuum, komisiyoŋ kaalis oo waɗii konte ɗiɗi e nder wuro Labe fii jaɓɓagol balle kaalis e dokke goo.
Idiriisa Sanpirin JALLO
Ardiiɗo bayyinaango infosbruts.com
jokkondiral: (00224) 622 269 551 e 657 269 551 e 664 46 71 71
