Gine, 12 tataɓuru (IBC) – Ɓuri yinɓe teemeɗɗe njowo faatike Gine battane nawna jonte gila nduu lewru jeeɗiɗaɓuru haa e sappoo e ɗiɗaɓuru ndee hitaande guluuji ɗiɗi e noogay, hollitii kippuɓe raɗagol nden nawnaare no sappoo jamaa saliiɗo huutorde sankeeji ɗin ado wirtugol ɠakkereeji yaltituɗi sengo ñawndooɓe ɓe e nokkeeli ñawndirɗi ɗin, jaynde mon infosbruts.com nanirii ɗun yesooɓe ɓen.
Fii kala laamu Gine no wakkilii, huuwondire adunayankooje no wallitii, ɓuri yinɓe 500 faatike Gine battane nawna jonte gila nduu lewru jeeɗiɗaɓuru haa e sappoo e ɗiɗaɓuru ndee hitaande guluuji ɗiɗi e noogay, fellintinaniimen dokteer Aysata Fofanaa, ardiiɗo ndee eɓɓoore fii darnugol nawna jonte on ka leydi Gine, no wiee Porojee Stop Palii pilis Gine.
Oo adadu yaltintinaaɗo tawnoraa limoore ɓee faatiiɓe ka galleeji ma ka cuuɗi ñawndirɗi ɗi laamungun jeyaa (maa anndaa fii mun). Halfinaaɗo ardagol ñawndoorenden e tabintinngol cellal ngal ka diiwal Labe, no maakee dokteer Mammadu Huudi Baa andintinii wondema pehe ƴettaaka fii no ɓen gollanayɓe hooremun waawira ñawndirde nawna jonte on hara nawnuɗo on ittaali hay buuɗu.
Sengo makko, gooto e ɓee halfinaaɓe ngoo cippiro fii reugol ndee nawnaare jonte ka leydi Gine (Progamme National de Lutte contre le Paludisme), dokteer Aliwuune Kamara no feli ko woɓɓe e jamaa on alaa jaɓude huutorde ɗii sankeeji ɗi laamungun woni okkitirde senditana yinɓe ɓen e dow ballal huuwondire adunayankooje.
Oo toowa darjaajo ɓeyditiri maakuuji makko ɗin andintingol ɠakkereeji yaltituɗi sengo ñawndooɓe ɓen e nokkeeli maa alaaji ñawndirɗi ɗin. Ƴakkereeji feeñuɗi nokkeeli goo ka leydi Gine.
Ɗunɗoo no holli tamawu sembaa e ndee eɓɓoore laamungun fii ɗuytugol e nder teemedere kala cappanɗe jeeɗiɗi e jowi nawnooɓe jonte ka leydi Gine ɗoo e ndee hitaande 2022 naatude.
IBC/12/tataɓuru/2021 ISD
